Desisyon sa kaso ni Allan Dizon giuktaba

Wala mahimuot ang kabanay sa napatay nga tigbalita ning mantalaan human madungog ang desisyon sa korte nga nag-uktaba sa "promulgation" kun pagbasa sa desisyon sa kaso batok sa suspek nga si Edgar Belandres nga gitakda unta kagahapon apan gisibog karon nang Enero 19 sunod tuig.

Si Amelina Dizon nasagmuyo human basaha sa sala ni Regional Trial Court Branch 5 Judge Ireneo Lee Gako Jr. nga nagtugot sa mosyong gisang-at sa manlalaban ni Belandres nga si Atty. Pedro Leslie Salva, ang korte nakadawat sa mosyon niadto lang Lunes sa hapon.

Gipangandoy ni Amelina nga mahimong pinaskuhan ug benertdihan ang pagkakombikto kang Belandres sanglit magsaulog usab siya sa ika-32 niyang adlaw'ng natawhan karong Disyembre 30.

Wala ikalilong sa hulagway ang pagkadismaya sa nabiyuda ni Dizon sa maong desisyon.

"Pinaka-gipaabot ni nako nga pinaskuhan ug binertdihan unya na-postpone pa jud," asoy pa sa naghilak nga si Amelina sa mga tigbalita kagahapon human sa hearing.

Si Judge Gako sa iyang bahin mitugot sa mosyon ni Salva gumikan usab sa paghatag og "malipayong" pasko sa akusado ug sa mga kabanay niini, apan gipahimangnuan ang depensa nga dili na mahimong mosang-at pa og laing mosyon nga maghangyong iuktaba na sad ang bag-ong gi-schedule nga pagbasa sa desisyon.

Kahinumduman niadtong Nobiyembre 10 ning tuiga gipahibalo ni Judge Gako nga basahan na sa desisyon si Belandres karong Disyembre 20, Gibase usab sa huwes sa Rules of Court ang pagtugot sa mosyon sanglit nagmando ang patakaran sa korte sa paghatag og 90 ka adlaw sa mga huwes aron desisyunan ang kaso human mapahibalo ang duha ka habig kung kanus-a ang pagbasa sa desisyon.

Sumala pa ni Salva nga bisan wala maghatag og alibyo sa kapalaran ni Belandres ang pag-uktaba sa desisyon makunsiderar na gihapon kining pinaskuhan alang sa pamilya sa akusado bisan kini diha gihapon magpasko sa Bagong Buhay Rehabilitation Center.

"In life we always hope for the best but expect for the worst. But we can't accept such conviction this Christmas season," sumala pang Salva nga midugang sa dakong pagsalig nga makab-ot ang hustisya sa duha ka habig.

Nasayran nga ang duha ka pahinang mosyon ni Salva niadto pang Disyembre 16 gipadangat ngadto sa sala ni Judge Gako apan niadtong Lunes sa hapon lang kini nadawat, ang mosyon mihangyo sa pag-uktaba sa pagbasa sa desisyon ug ibalhin kini sa Enero 2 o ba kaha 3 sunod tuig. - Edwin Ian Melecio uban sa taho ni Liv Ocampo