Idlas nga 'pusher' nabisto

Simpleng kalapasan sa "overnight parking" nisangpot sa pagkaaresto sa usa ka lalaking una nang nakalingkawas sa laang sa mga sakop sa Philippine Drug Enforcement Agency niadtong milabay'ng semana human kini miadto sa buhatan sa Cebu City Police Office Traffic division kagahapon sa buntag aron lukaton ang iyang sakyanan.

Kini dihang sa iyang pag-adto sa maong buhatan aron unta lukaton ang iyang kolor "dark blue" nga Daewoo 1997 model nga gibira sa City Traffic Management Office diha sa Happy Valley Subdivision gumikan kay giabandonar kini.

Matud pa sa imbestigasyon sa kapolisan ang Traffic Enforcer nga si Manuel Dagaan maoy nakasigpat sa maong sakyanan maong ila kining gisusi, apan sa paglili sa bildo nga bintana nakit-ang duna kini mga armas diha sa may lingkuranan sa driver maong ila kining gibitad sa ilang buhatan sa Natalio Bacalso.

Didto sa maong buhatan nakuha ang usa ka HME rifle nga may silencer, usa ka kalibre 38 rebolber nga may sulod nga unom ka buhing bala ug usa ka kalibre 380 nga may sulod nga tulo ka buhing bala.

Nianang pagka-ala una sa kadlawon kagahapon usa ka Jeffrey Carlito Dignos ang miadto sa ilang buhatan ug nangangkon iya ang maong sakyanan gani mipresentar kini og lisensya ug registration sa maong sakyanan.

Apan nagduda ang mga polis gumikan kay kadudahan ang lihok niini maong gipaisa ang sinina niini diin nasutang dunay kini giluklok nga swiss knife apan ang sulod tooter diay, hinungdan nga giaresto kini.

Sa pagrekisa kaniya gikatahong nakuhaan pa kini og 10 ka medium size nga packs nga may sulod nga shabu nga mikabat og 43.08 gramos ug cash nga P15,500.

Sumala pa ni Inspector George Ylanan, hepe sa Vice Control Section sa pakighinabi sa The Freeman/Banat News nga si Dignos nalakip sa talaan sa mga drug pushers sa kapolisan ug usa kini ka level two drug pusher diin makabaligya og 200 gramos matag semana.

Dugang pa niini nga giingong si Dignos dunay koneksyon sa mga bigtime drug pushers sa A. Lopez barangay Labangon nga nahimong ilado kaniadtong tuig 90's.

Nasuta usab nga si Dignos maoy subject sa search warrant sa Philippine Drug Enforcement Agency nga wala mahinayon niadtong milabay'ng semana gumikan kay matud pa ni PDEA operations Chief Recel Carmelo Dayon sa pakighinabi usab sa The Freeman/Banat News nga nakatimaho si Dignos nga ang gikatransaksyon sa iyang "bata-bata" mga polis nga kasamtangang naniid sa iyang presensya, daling misibat si Dignos sa maong lugar.