1 barrel pulbora miulbo, pyro worker namatay

Laing aksidente sa pag-ulbo sa himuanan og pabuto diha sa dakbayan sa Lapu-Lapu sa miaging gabii nga miresulta sa kamatayon sa usa ka lalaki dihang miulbo ang usa ka barrel nga gituohang kemikal nga himuong sagol sa paggama sa pabuto.

Giila ang namatay mao si Marjon Baguio,23 anyos, taga barangay Cogon lungsod sa Cordova ug kasamtangang nagtrabaho sa buhatan og pabuto sa Sitio Rambo barangay Babag 2 sa naasoy'ng dakbayan.

Si PO3 William Humoc sa Homicide Section sa pagpakighinabi sa Banat News kagahapon mibutyag nga ang miulbo mao ang wala pa matinong matang sa kemikal nga gisulod sa barrel diha sa gawas sa payag-payag sa buhatan og pabuto.

Sumala pa nga ang gikahimutangan sa maong drum diha sa tugkaran sa gamyang buhatan usab og pabuto nga gipanag-iya ni Dennis Casol, 30 metros ang gilay-on gikan sa gibarugan ni Baguio.

Si Baguio nagtrabaho sa paktorya sa pabuto nga gipanag-iya ni Teresita Pepito nga gituuhang usa usab ka sub-contractor sa mga pabuto.

Matud pa sa imbestigasyon ni SPO2 Rolito Jumao-as nga dihang nagbarog-barog si Baguio sa gawas sa payag ni Pepito kalit nga miulbo ang drum ug ang nanglupad nga bato ug mahait nga butang nga milupad ug miigo sa iyang ulo ug liog nga nakaingon sa hinanali niining kamatayon.

Gituohang ang maong drum maoy gisudlan sa "ready mix" nga mga kemikal nga gamitong pulbura sa mga pabuto, apan wala pa matino sa kapolisan kun giunsa ug nganong miulbo kini nga nakaingon sa aksidente.

Duha na ka bulan ang milabay dunay usa ka pamilya ang namatay gumikan usab sa pag-ulbo sa buhatan sa pabuto sa samang barangay diin dead on the spot ang usa ka bata ug naanam og kamatay ang mga naangol diha na sa Vicente Sotto Memorial Medical Center.