Tonggo island i-develop para sa Badjaos

Gipangayo ni Mayor Tomas Osmeña ngadto sa konseho nga mahatagan og pagtugot alang sa plano nga paglagdaay og kasabutan tali sa lokal nga kagamhanan sa lungsod sa Cordova aron kasugdan ang pag-develop sa Tonggo island nga sakop sa maong lungsod.

Kini kabahin sa tinguha ni Osmeña nga pagbalhin sa mokapin sa 400 ka mga Badjao diha sa Alaska, Mambaling ning dakbayan sa Sugbo ngadto na sa Tonggo Island.

Nasayran nga gikinahanglan pa nga i-develop ang maong lugar una pa pormal nga ma-relocate ang mga pamilyang Badjao diha sa Tonggo Island human gipaboran usab ni Cordova Mayor Arleigh Sitoy ang plano ni Osmeña.

Kini human usab mipasalig si Osmeña nga mohatag og duha ka hektaryang luna diha sa South Reclamation Project (SRP) ngadto sa lungsod sa Cordova agi og pasalamat sa siyudad sa pagpaluyo niini sa mga gipatumang programa sa dakbayan.

Si Konsehal Nestor Archival maoy mipanday og resolusyon nga mag-awhag sa iyang mga kaubanan sa konseho aron kahatagan og gahum si Osmeña nga makiglagdaay og Memorandom of Understanding tali kang Sitoy sa Cordova.

Apil sa gitakdang mopirma sa maong kasabutan mao ang National Commission on Indigenous People, National Housing Authority (NHA), Badjao Tribal Community, Aboitiz Foundation Inc. ug Department of Environment and Natural Resources (DENR).

Sayo niini nakasugat og pagsupak gikan sa pipila ka mga konsehal sa Cordova ang maong plano apan mipasalig si Sitoy nga mapasabot ra niya ang iyang mga sakop sa konseho kabahin ning maong programa.