Maigo sa Talisay fishport gipasaligan sa CH

Nahuwasan sa kakulba ang mga molupyo sa Tangke, Talisay City karong nasayran na nila nga aprobahan na sa konseho sa dakbayan ang ilang giintrahang "memorandum of agreement" (MOA) tali sa kagamhanan.

Si Alejandro Cabardo, lider sa Pundok sa Gagmay'ng Mananagat sa Sawsawan (PGMS) nagkanayon nga mao ray ilang paglaum nga kaaprobahan sa konseho sa Talisay ang MOA nga iyang gipirmahan ug ni Mayor Socrates Fernandez dili pa dugay.

Kini aron pagsiguro nga dili maungkag ang ilang pagpuyo diha sa Sityo Sawsawan, Tangke sa higayong sugdan na pagtukod ang P37 milyones nga pantalan sa mga isda kon "fish port", karong buwana.

Alang kang Cabardo, dakong hulga sa ilang panginabuhi ug pagpuyo ang maong proyekto niadtong wala pa sila makadawat og pasalig gikan kang mayor Fernandez.

Bisan pa dihang nahuman na ang MOA, gikulbaan lang gihapon sila si Cabardo ilabi na nga wala pa kini kaaprobahi sa mga magbabalaod sa dakbayan.

Ang fish port sugdan na sa pagpanday ning buwana ug gipaabot nga sa tuig 2006 magamit na kini.