Rescue operation sa mina gihunong tungod sa taas nga methane level

Gipakpakan pa sa mga minero ug mga kabanay sa mga biktima sa miulbong minahan sa Dalaguete ang pag-abot sa mga eksperto sa Philippine National Oil Company niadtong Martes sa pagtuong wala nay puas ang operasyon sa rescue and retrieval operation. Apan nadismaya ang mga tawo gumikan kay giingong gipahunong una sa Department of Energy ang pagkubkub sa tunnel gumikan sa pagtaas sa level sa methane gas.

Kini bisan kumpleto sa ekipo pagsulod sa mga delikadong lugar ang mga taga PNOC sumala pa sa administrative assistant ni Dalaguete Mayor Ronald Alan Cesante nga si Rydal Cisneros sa pakighinabi sa Banat News.

Sumala pa ni Cisneros gisugdan ang operasyon alas 8 sa buntag hangtud alas 12 sa udto diin nakahabwa ang mga minero og 52 ka toneladang carbon nga nag-ali diha sa agianan.

Apan pag-abot sa mga taga PNOC gimando sa DOE nga dili na pabalikon ang mga minero gumikan kay misaka ngadto sa 7 porsiyento ang level sa methane diin ang luwas nga level 2.5 porsiyento paubos.

"Dismayado man ang mga tawo didto kay naa na untay taga PNOC nga fully equipped pero wala man makasulod dayon kay nagtan-aw tan-aw pa sa mapa unya nangaon, dayon namahulay," asoy pang Cisnero.

Gipanglantawan sa mga minero nga kun gipasagdan silang makapadayon sa pagtrabaho niadtong Martes base sa gipaspason nga ilang nahimo sulod sa upat ka oras hayan nakaabot na sila sa gikahimutangan sa mga kaubang nalubong sa ilawom.

Gibanabanang 100 ngadto sa 200 toneladang carbon ang nagtabon sa agianan padulong sa sulod sumala pa ni Cisnero. Niadtong Lunes gipabutangan na kini og duha ka 'air ducts' aron mapagawas ug ma-neutralized ang methane diha sa sulod.

Usa sa gibutyag nga problema matud pa ni Cisnero mao ang dili pagkapareho sa resulta sa "methane detectors" nga gidala sa DOE ug sa mismong gigamit sa IRDC, matud pa ni Cisnero nga niadtong Martes sa buntag mirehistro ang detector sa Ibalong og 2 porsiyento samtang ang sa DOE 2.11 porsiyento, nunot niini kini makapalibog kung mopadayon o dili ang mga tawo.

Apan si DOE director Antonio Labios sa pakighinabi sa Banat News mibutyag nga bisan ang 2 porsiyento delikado para sa tawo, matud pa niya nga uno porsiyento ra ang mahimong tolerable sa tawo.

Nangayo usab siya og dispensa ngadto sa mga kabanay sa mga biktima gumikan sa ilang pagkadismaya nga gipahunong ang pagpasulod og mga tawo didto gumikan usab sa kaluwasan sa mga tawong mohimo sa maong trabaho.

'Ato lang pasabton ang mga kabanay ug mga tawo didto nga dili nato mahimong ikompromiso ang operations sa rescuers kay gilikayan nato ang dugang pa unyang disgrasya," pagpasabot pa sa director.

Matud pa niya ang seven-man team sa PNOC nga gipanguluhan ni Mike Aliganga mi-request pa og dugang "air ducts" aron mas mapadali ang pag-neutralize sa methane diha sa tunnel.