Gipatay sa mag-ama kay wa mohatag balato

Gumikan sa wala paghatag og "balato" human modaog sa sugal nga masiao usa ka batan-on ang gitabanga'g patay sa iyang mga paryenteng wala niya kahatagi diha sa Sitio Agbagon, Barangay Adlawon ning dakbayan niadtong milabay'ng gabii.

Giila sa Homicide Section sa Cebu City Police Office ang biktimang si Darwin Bordadora, 22, molupyo sa maong dapit, samtang giila usab ang mga suspek nga mao ang mag-amahang si Gaudioso Herenia ug duha ka anak nilang sila si Lope ug Edwin.

Sumala pa ni SPO3 Dennis Moga sa pakighinabi sa Banat News subay sa imbestigasyon nila ni SPO2 Jay Yballe nga gikan pa nagduwa og bilyar ang biktima uban sa tulo niini ka mga higala ug mga anak ni Gaudosio.

Matud pa, nagkalalis ang biktima ug mga suspek nga misangpot sa panagsumbagay diin si Lope giingong milipot sa luyo ug mibunot og armas apan dunay mialam-alam kanila hinungdan nga namauli ang mga Herenia.

Apan sa pag-uli sa biktima uban sa mga higala giatangan sila sa mga Herenia uban na ang ilang amahang si Gaudosio ug diha-diha gipusil ni Lope si Bordadora sa likod. Pagkahagba niini giingong gitiwasan pa kini og pusil ni Edwin tulo ka higayon samtang si Gaudosio maoy miwara-wara sa sundang ngadto sa mga kauban sa biktima aron dili manginlabot.

Human sa insidente yanong nanglakaw ang tulo samtang namatay gyud ang biktima diha-diha. Nasayran sa imbestigasyon ni Yballe nga gidumtan sa manag-amahan ang biktima gumikan kay wala kini mohatag og "balato" kanila.