Kini human nadiskubrehan karong bag-o nga molanat gyud ngadto sa P7 milyones ang kinatibuk-ang nahabiling utang ngadto sa mga hotel ug uban pang mga supplier dinhi sa Sugbo sa pag-accommodate ug pag-abi-abi sa mga atleta gikan sa lainlaing kanasuran nga nag-estambay dinhi sa Sugbo samtang gipahigayon ang mga duwa sa maong kompetisyon.
Gibutyag ni Konsehal Sylvan Jakosalem, tsirman sa committee on sports sa konseho sa dakbayan nga dili ang Cebu South East Asean Games Organizing Committee (CEBUSOC) maoy manubag niining tanan gumikan kay nakahatag na og bayad ang mga atleta gikan sa lainlaing kanasuran ngadto sa PHILSOC kabahin sa ilang tanang gastohan sa pag-estar og pagkaon nila dinhi sa Sugbo.
Gituohan sa konsehal nga posibleng nahurot og gasto ang maong gahin nga gibayad sa mga atleta gikan sa lainlaing kanasuran ngadto sa PHILSOC sa mga kalihukan didto sa kaulohan gumikan kay mas bongga ang opening ug closing ceremonies sa 23rd SEA Games sa maong lugar kun itandi dinhi sa Sugbo.
Giawhag sa konsehal ang mga tagdumala sa hotel ug uban pang supplier nga maoy nag-abi-abi sa mga atleta sa milabay'ng SEA Games nga hangtod karon wala pa mabayri nga mohatag lang og gamay'ng pasensiya gumikan kay gi-asikaso na nila ang pag-follow-up ngadto sa PHILSOC aron mahilot ang maong utang.
Gitug-an sa konsehal nga tinuoray nga naglisud gyud og gahin ang CEBUSOC atol sa pag-host niini sa ubang mga duwa sa SEA Games nga gipahigayon dinhi sa dakbayan, Mandaue ug siyudad sa Toledo hinungdan nga nakagasto ang siyudad sa Sugbo og kapin sa P3 milyones alang sa mga pagkaon sa mga volunteer ug uban pang panginahanglanon.
Matud sa konsehal bisan si Gerry Guardo, ang tsirman sa CEBUSOC nakagasto kini sa iyang personal nga kuwarta aron lang magmalampuson ang pagpahigayon sa ubang mga duwa sa SEA Games dinhi sa Sugbo.
Gani una nang gireklamo ni Mayor Tomas Osmeña nga nahurot ang P1.6 milyones nga pundo sa Cebu City Sports Commission nga giapil og gasto sa opening day sa SEA Games nga walay pagtugot gikan kaniya.