Gision nga dolyares di gyud mailisan - BSP

Ang kadagkoan sa Bangko Sentral ng Pilipinas (BSP) mikonpirmar nga dili mapugos ang mga bangko ug ang mga foreign exchange dealers sa pagdawat og mga gisi nga US dollars.

Si Ma. Aurora Cruz, direktor sa cash department sa Bangko Sentral ng Pilipinas mihimo sa maong konpirmasyon ngadto sa kadagkoan sa City Hall, kinsa nagpakisayod kabahin sa maong isyu.

Ang konseho sa dakbayan mihimo og resolusyon atol sa ilang sesyon kaniadtong Septiyembre 28 nga nag-awhag sa Bangko Sentral ng Pilipinas tungod sa reklamo nga ilang nadawat gikan sa katawhan.

Mireklamo ang ubay-ubay'ng mga lumulopyo sa Sugbo tungod kay ang ilang mga dolyar nga adunay bisan gamay ra kaayong gisi, dili na dawaton sa mga bangko.

Si Cruz mitataw nga ang mga US dollars nga dunay gisi maisip nga "mutilated" ug dili angay'ng dawaton.

Tungod niini, ang lagda mao nga ang mga US dollars ipadala pa sa operations section sa Bureau of Engraving and Printing didto sa Washington DC.

Gipasabot ni Cruz nga lahi ang kadagkoan sa bangko didto sa Estados Unidos kay dili kini modawat og mga gision, bisan gani ang mga dunot na nga dolyar.

Kini lahi sa Bangko Sentral ng Pilipinas nga modawat ra sa mga papel de-bangko nga bisan og nahumok na kaayo tungod sa pagpilo-pilo sa mga naghupot niini.

Sa laing bahin, gitataw ni Cruz nga dili tinuod nga ang mga bangko dili na modawat sa mga US dollars nga nahimo sa tuig 1996.

Ang cash division sa Hongkong Shanghai Bank ingon man sa Bank of America mipasabot nga ang tanang papel de-bangko sa Estados ilang dawaton kon masuta lang nga kini genuine.