Namasangil sa bombero ikiha kun...

Naglaraw si Cebu City Fire Marshal Supt. Esmael Codilla nga mosumbalik pagsang-at og kaso batok sa sakop sa pamilyang nasunogan diha sa barangay Quiot Pardo ning dakbayan sa Sugbo niadtong miaging semana.

Kini sa higayon nga dili ipadayon sa 22-anyos nga batan-on nga si Timothy John Galleto ang pagduso sa reklamo niini nga magpalig-on sa iyang pasangil batok sa sakop sa kabomberohan nga miresponde sa maong sunog ug nanghilabot sa iyang P2,500 nga kwarta diha sa iyang lawak.

Si Galleto una nang mitumbok sa usa sa tulo ka mga bombero nga misulod sa iyang lawak aron pagpatay sa sunog ang nakit-an kini niyang mipunit sa iyang pitaka diha sa iyang kama sa kwarto nga dunay sulod nga kwarta.

Si Mayor Tomas Osmeña nga nakadawat sa maong pasangil mibahad kini nga iyang pahamtangan og silot ang tibuok sakop sa kabomberohan dinhi sa dakbayan pinaagi sa pagputol sa ilang incentive kun mapamatud-an ang maong pasangil.

Si Codilla niadto pang miaging semana nagpaabot sa maong reklamante nga moduso og pormal nga reklamo sa iyang buhatan aron kasugdan dayon ang imbistigasyon sa maong pasangil.

Apan hangtod kagahapon gitug-an ni Codilla sa Banat News nga wala pa gyud siyay nadawat nga pormal nga reklamo gikan sa biktima ug wala gyud kini moduol sa iyang buhatan.

Gitakdang padalhan og suwat ni Codilla si Galleto aron imbitahon sa iyang buhatan alang sa himuong pagsukitsukit kabahin sa mao niyang pamasangil.

Matud pa ni Codilla mapugos sila pagsumbalik pagsang-at og reklamo batok kang Galleto kun dili mosanong sa mao niyang imbitasyon gumikan kay sama lang nga gipakauwawan niini silang mga sakop sa kabomberohan gumikan sa maong alegasyon.