Nangita ni Leo mipusil patay sa tagbalay

Duha ka wala mailhing mga lalaki nga nangita kang Leo Lastimosa mipusil patay sa tagbalay nga ilang gipangutan-an ug gipangayuan pa og tubig mainom niadtong Domingo sa hapon diha sa lungsod sa San Fernando.

Daghang igo sa likod ug sampot ang biktimang si Danilo Voos,32, molupyo sa barangay Basak lungsod sa San Fernando kinsa wala na matabang ug nakabsan sa kinabuhi human siya pusila sa duha ka lalaki.

Sumala pa sa imbestigasyon sa San Fernando Police ang duha ka mga suspek nangabot diha sa gipuy-an sa biktima ug kapuyo niini nga si Helen Canoy ug nangayo'g tubig mainom.

Human makainom giingong nangutana ang duha kun nakaila ba kini kang Leo Lastimosa ug kung hain kini magpuyo sumala pa nga dunay sukoton nila sa kuwartang giutang ang giingong ang tawong ilang gipangita.

Nunot niini ang biktima mitambag sa mga suspek nga adto na lang sa barangay hall mangutana sanglit wala siya makaila sa maong tawo.

Matud pa ni SPO3 Raffy Sapira sa pakighinabi sa Banat News mitug-an nga posibleng dili ang sikat nga anchorman sa DyAB- ABS-CBN kinsa kolumnista usab niining mantalaan ug igsuon usab nga mantalaang The FREEMAN nga si Leo Lastimosa ang tuyo sa duha kun dili ang biktima mismo.

Sumala pa ni Sapira base sa gipamahayag sa igsuon sa kapuyo sa biktima nga wala sila makahibalo kun taga diin gyud ang biktima sanglit bag-uhay pa kining mipuyo diha sa ilang lugar