Tulisan misukol sa polis napusilan

Nameligrong maputlan og tiil ug magpasko sulod sa bilanggoan ang usa ka batan-ong giingong misuway og pusil sa mga polis sa Carbon police station dihang naaktuhan kining nanulis sa usa ka PUJ diha sa eskina sa mga dalan F.Gonzales ug Lincoln sa Carbon Market niadtong milabay'ng adlaw.

Milandig sa tambalanan mao ang suspek nga si Jessie Añabisa,18, molupyo sa dalan Quezon barangay Ermita ning dakbayan human kini mapusili ni PO3 Fortunato Macaranas kinsa maoy beat patrol sa nahisgutang lugar niadtong tungura.

Usa ka Jimboy Sedaya, 20, taga dalan Boromeo barangay Kalubihan maoy gitulis sa suspek ug gikuha ang pitaka niining may sulod nga kuwarta ug daling mikanaog sa PUJ pag-abot sa maong dapit.

Apan ang komosyon nabantayan ni Macaranas kinsa daling miresponde ug migukod sa suspek, giingong imbes nga motahan mition hinuon sa iyang armas ngadto sa polis ang suspek hinungdan nga gipusil siya diha sa tuong tiil.

Daling gidala sa polis si Añabisa sa Cebu City Medical Center alang sa pagpatambal, giingong nabali ang bukog sa tiil sa biktima ug nameligrong putlon kun dili maluwas sa mga mananambal.

Narekober gikan sa suspek ang pitaka ni Sedaya ug usa ka improvised single shot nga frontier nga may sulod nga usa ka balang kalibre 5.56 kun bala sa armalite.