Lokal nga kontak sa shabu lab sa Umapad mailhan

Ang lokal nga kontak ug protektor sa gitukod nga shabu laboratory mahibaw-an lamang kun motug-an niini ang usa sa 11 sa mga dinakpan nga si Joseph Yu.

Kini ang gipadayag sa vice chairman sa Committee on Dangerous Drugs sa ubos Balay Balaoranan nga si kongresista Antonio Cuenco.

Matud pa ni Cuenco sa husay nga gihimo niadtong miaging adlaw sa sala ni Judge Marilyn Yap sa kaso ni Calvin de Jesus Tan kinsa gitumbok nga maoy pinanser ang milig-on tungod sa pamahayag sa saksi.

Dugang pa niya maayo ang pagkahan-ay sa pamahayag sa Iranian national nga si Tamadoni Monteza nga ilang gipresentar isip witness sa kaso nga ilang gipasaka batok kang Tan.

Gitug-an ni Tamandoni nga si Tan ug Hung Chin Chang mao gayod ang utok sa pagtukod sa shabu laboratory sa barangay Umapad sa dakbayan sa Mandaue.

Sumala pa ni Cuenco nga ilang gitun-an karon kun angay ba nga malakip sa state witness si Joseph Yu nga ilang gituohan nga mao lamang gayod ang adunay kasayuran sa mga utok ug protektor sa nadiskubrehan nga laboratoryo sa shabu.