Paglig-on sa seguridad tinguha para ASEAN fete

Giklaro ni Bise Mayor Michael Rama nga pagpalig-on sa seguridad aron batukan ang mga hulgang pagpamomba gikan sa mga terorista ang tumong ug dili martial law ang giplano ni Mayor Tomas Osmeña nga paghigpit sa seguridad atol sa pag-host unya sa dakbayan sa Sugbo sa ASEAN Summit nga ipahigayon dinhi unya sa Disyembre sunod tuig.

Karung alas 9 sa buntag gitakdang mogikan na si Osmeña kauban ni Ricky Ballesteros ang manager sa Cebu City Sports Center ug City Information Officer Nagiel Bañacia paingon sa Kuala Lumpur, Malaysia aron pagtambung sa ASEAN summit karong tuiga nga sa maong nasud ipahigayon.

Gibutyag ni Rama nga nasayod siya nga wala gyud sa hunahuna sa mayor ang pagpatuman ning gitawag niya og "semi-martial law" gumikan kay ang mga Rama ug Osmeña pulos kini biktima sa pagpangabuso sa martial law nga gipatuman niadtong diktadoriyang rehimeng Marcos.

Nasayran nga dunay dili mominos 17 ka mga head of state sa lain laing kanasuran ang gitakdang motambong sa pagpahigayon unya sa maong summit dinhi sa Sugbo karong sunod tuig.