Gisulod sa mga gidudahang tulisan ang 24-25 Finance Corporation nga giingong tigpautang nga naa mahimutang sa Villa Lourdes apartment sa dalan Tres de Abril barangay Punta Prinsesa ning dakbayan.
Sumala pa ni SPO1 Socrates Bacalso sa Punta Police station sa pakighinabi sa Banat News duha ka wala mailhing mga lalaki ang misulod sa maong estabilisamento dayong tion kanila og wala matinong kalibre sa armas ug mideklarar og tulis.
Matud pa pugsanon silang gigapos sa usa ka tulisan gamit ang alambre samtang gipangtiunan ang mga kawani ug gipanguha ang gibana-banang P100 mil nga nakolekta nianang adlawa ingon man mga cellphone sa branch manager nga si Gina Laproso ug kolektor nga si Gary Relo.
Nakuha usab ang gibilin nga armas sa guwardiya nga usa ka kalibre 38 nga may sulod nga unom ka buhing bala nga gipanag-iya sa Montañez Security Agency ug motorsiklong Honda wave kolor yellow sa ilang supervisor nga si Rolly Remontal.
Apan si SPO2 Genilo Veraque sa Theft and Robber Section nagkanayon nga walay nailhan ang mga testigo sa mga hulagway sa mga tulisan sa rogue gallery sa ilang buhatan.
Usa sa gikahibulong ni Veraque mao ang pagsangpit sa usa sa mga suspek sa pangalan ni Gina. Gani mao pay gipangayuan sa armas nga gibilin sa gwardiyang mipauli na sayo pa niana.