Drayber mikirig kay nakuryente

Nasunog ang kalawasan sa usa ka tawo kinsa nagmaneho og dump truck nga puno sa ilabay nga mga biya sa tubo human kalit lang nasaghid sa live nga cable sa Cebu Electric Company II alas 10 sa buntag niadtong miaging Domingo didto sa barangay Luy-a, lungsod sa Medellin, Cebu.

Si Peter dela Peña, 40 anyos, minyo, drayber sa trak de karga sa Bogo Medellin Milling Company ug nagpuyo sa nahisgotang dapit namatay gyud tungod sa taas nga boltahe sa kuryente.

Si SPO1 Manuel Allan Tan sa Medellin Police Station miingon nga puno sa mga biya nga sagbot ang dump truck ug ilabay na unta kini sa nahisgotang dapit.

Matud pa niya nga dihang ilabay na unta ang maong sagbot kalit lang nasaghid sa live nga cable ang ligid sa maong sakyanan nga maoy nakaingon sa kalit nga pagkasunog ug lakip na sa mga sagbot.

Ang biktima nga nagmaneho sa maong sakyanan mikirig sa gilingkoran niini atubangan sa manibila nga maoy nakaingon sa hinanaling kamatayon.