Duha na ka tambalanan ang gidad-an sa biktimang si Tomas Lao, 20, molupyo sa barangay Cambanay sa naasoyng dakbayan apan nakabsan gihapon sa iyang kinabuhi gumikan sa samad pinusilan diha sa iyang likod ug tiyan.
Gitumbok nga maoy gipusil kaniya giilang si Julius Perez, hingkod ang panuigon, apan wala pa ikumpirmar sa kapolisan kun sakop ba sa ribal nga grupong Tau Gamma.
Base sa imbestigasyon sa Danao City Police kasamtangang naglingkod ang biktima diha sa atubangan sa usa ka tindahan sa ilang barangay dihang naabot ang suspek ug walay pahibalong mipusil kaniya makadaghang higayon.
Human sa insidente daling miikyas ang suspek samtang gidali og dala ang biktima sa Danao General Hospital ug gibalhin sa Vicente Sotto Memorial Medical Center diin kini gideklarar sa mga mananambal nga dead on arrival.
Sumala pa ni SPO1 Jose Relampagos sa pakighinabi sa Banat News nga ang biktima giingong may kalambigitan sa insidente sa pagpamusil sa usa ka giingong hitman sa Tau Gamma Phi kinsa lima na ka bulan ang milabay.
Gikatahong ang kaso kasamtangan pang gihusay sa korte samtang ang maong hitman nga wala nganli ni Relampagos kasamtangan nagtago-tago gikan sa awtoridad.