Koleksyon sa BID midako karong '05

Mokabat sa P138 milyones ang nakolektang salapi sa Bureau of Immigration and Deportation (BID7) niining tuig 2005.

Si BID Director Geronimo Rosas maoy mipadayag niini ngadto sa mga tigbalita nga nakighinabi kaniya niadtong miaging adlaw.

Matud pa niya nga ang nakolekta niining tuiga taas pa sa ilang nakolekta sa tuig 2004 nga mokabat lamang sa P118 milyones.

Gipasabot ni Rosas nga ang pagbalhin ngadto sa ilang buhatan sa pagkolekta sa Special Study Permit ug Special Work Permit maoy nakatabang sa ilang buhatan nga mousbaw ang ilang koleksyon.

Kini human mipagawas og kamanduan si BID Commissioner Andrea Domingo sa pagbalhin sa collection niini ngadto sa ilang buhatan.