Accreditation sa bookkeepers ilusad

I-accredit na sa siyudad sa Sugbo ang tanang mga bookkeeper nga moduso ug mo-asikaso sa paglukat ug pag-renew sa business ug sanitary permit diha sa Cebu City Hall sugod karong Enero sunod tuig.

Subay kini sa giduso nga rekomendasyon sa City Attorneys Office ngadto kang Mayor Tomas Osmeña human gituohan nila nga kining maong paagi maoy makasulbad sa mga mitumaw nga pagpalusot sa mga mini nga business ug sanitary permit nga nadiskubrehan karong tuiga.

Giangkon ni City Administrator's Francisco "Bimbo" Fernandez nga anaa na karon sa iyahang buhatan ang maong rekomendasyon gikan sa City Attorneys office ug gitakda pa niya kining iduso ngadto sa mayor alang sa pag-aprobar ning maong tinguha.

Apan alang kang Fernandez haom kaayo ang maong lakang gumikan kay pinaagi unya niini mamonitor na ang tanang mga bookkeeper mo-apply og permit ingon man kadtong mga establisamento nga mo-renew sa ilang permiso.

Gibutyag ni Fernandez magsilbi usab kining proteksiyon ngadto sa mga negosyante dinhi sa dakbayan nga mapanalipdan ang ilang interes ug dili na subling mabiktima sa mga fake nga business permit nga gipasiugdahan karon sa pipila ka mga regular nga kawani diha sa City Hall.