Ginang gitabanga'g lugos

Si SPO4 Cristino Uraca ang deputy chief sa Boljoon police sa pakighinabi sa Banat News nagkanayon nga gitumbok sa biktimang 34 anyos nga ginang ang mga silingang sila si Marlon Carnilla Ilustrisisimo, 20, ug Edmund Agustin Rollon,18 nga maoy milugos kaniya niadtong Lunes sa kaadlawon.

Matud pa ni Uraca sa pasangil sa biktima nga kalit lang nanulod ang mga suspek diha sa ilang balay alas 4 sa kaadlawon, si Ilustrisisimo giingong maoy miuna'g lugos kaniya, dihang nahuman si Ilustrisisimo misunod usab si Rollon apan gikatahong igo lang 'nagdumbol-dumbol' ang naulahi.

Human sa hitabo misumbong ang biktima sa kapolisan hinungdan sa pagkadakop sa mga suspek sa mirespondeng grupo ni PO2 Danilo Sayon.

Matud pa ni Uraca nga gihuna-huna pa kagahapon sa biktima kung mopasaka ba og sumbong batok sa mga suspek, nasayran nga wala diha ang bana sa biktima sanglit nagtrabaho man kini sa usa ka piggery sa barangay Poblacion sa naasoy'ng lungsod.

Samtang sa laing bahin usa ka ama-ama nabisto sa dugay nang gitipigang sekreto nga pagmolestiya ug paglugos sa trese anyos nga anak sa iyang kapuyo dihang wala na makaagwanta ang bata misumbong kini niadtong Lunes.

Inubanan sa iyang inahan midangop ang trese anyos nga dalagita sa kapolisan ug mipasangil nga siya gilugos sa kapuyo sa iyang inahan nga si Jury (apelyedo gipugngan),34.

Si SPO1 Roland Reyes sa Medellin police sa pakighinabi sa Banat News mitug-an nga niadtong Oktobre 16 diha sa kasagingan giusban og lugos sa suspek ang bata ug nasundan pa kini makadaghang higayon. Apan niadto pa diay'ng milabay'ng tuig kini gihimo sa suspek.

Ning bag-ohay lang Nobiyembre 12 giusban og lugos ang biktima diha mismo sulod sa ilang balay samtang wala ang inahan. Sa kahadlok sa biktima nga mausban nasad gitug-an niya kini sa iyang inahan hinungdan sa pagkabalhog sa suspek sa bilanggoan.