P2.8 M lang nagasto sa opening sa SEAG

Giklaro sa manager sa Cebu City Sports Center Ricky Ballesteros nga wala makaabot og P4 milyones ang nagasto sa siyudad atol sa opening day sa 23rd Southeast Asian Games niadtong Biyernes sa milabay'ng semana dinhi sa dakbayan sa Sugbo.

Si Ballesteros nga usa sa miabag sa mga pagpangandam nga gihimo sa opening day sa SEA Games nga gipahigayon diha sa Cebu City Sports Center mipasabot nga mikabat lang ngadto sa P2.8 milyones ang kinatibuk-ang gasto sa maong kalihukan.

Gani iyang gitug-an nga duna pay laing gitagana nga pundo alang sa mga kalihukan sa closing ceremony sa SEA Games nga mokabat og P196 mil karong Dec. 5, Lunes.

Usa sa giingong naapil og gasto sa maong kalihukan mao ang P1.6 milyones nga pundo sa Cebu City Sports Commission nga gitagana alang unta sa mga kalihukan sa paugnat sa kusog sa kabarangayan dinhi sa dakbayan karong tuiga.

Hinuon gipadayag usab ni Jonathan Guardo, chairman sa Cebu Sports Commission nga didto kuhaa ang gahin nga gigamit sa opening day gikan sa P10 milyones nga pundo nga gihatag sa nasudnong kagamhanan. - Darrel A. Carumba