Balay gi-rapido, gilabay granada

Usa ka panimalay ang girakrakan ug gilabay pa og granada nga suwerteng wala kabuto diha sa silong sa balay sa usa ka mananagat sa Barili beach sa barangay Tinaan, lungsod sa Naga niadtong milabay'ng gabii.

Nakugang na lang ang mga sakop sa Naga police nga sila si SPO1 Rudolfo Baga, PO2 James Canoto ug PO1 Cristino Canono dihang sa ilang pagpamunit sa mga basiyo sa balang ebidensya diha duol sa girakrakang panimalay sa magtiayong Alberto ug Josefina Encabo nasagol ang usa ka safety pin sa granada.

Gumikan niini daling gipahimangnuan ang mga tawo nga dili magpaduol sa palibot sa maong balay gumikan kay dunay granadang posibleng gilabay apan wala kabuto kay walay nadunggang dakong buto atol sa pagparakrak gawas sa buto sa mga pusil.

Sumala pa sa imbestigasyon sa Naga Police ang managtiayong Encabo kasamtangang nangatulog dihang kalit nga dunay sunod-sunod nga buto sa armas ang ilang nadunggan hinungdan nga dali silang nanghapa, diha diha gikatahong nakakita sila sa paglabay sa granada apan wala kabuto maong dali silang nanagan palayo.

Si SPO2 Ceferino Camacho sa Cebu Provincial Police Office Bomb Disposal Unit miadto sa maong dapit ug gisusi ang balay diin nahimutang ang maong granada nga wala nay pin.

Nangabuslot agi sa pagpangrakrak ang pumpboat ug bangka sa magkabanay nga Calixto Pelago ug Proto Pelago.

Gisubay karon sa kapolisan sa Naga ang anggulong dunay gikaatraso ang mga biktima ngadto sa mga suspek.

Si Chief Inspector Renato Malazarte sa pakighinabi sa mga tigbalita nagkanayon nga posibleng pagpanghadlok lang kadto sanglit gilakip man og rakrak ang mga bangka.

Upat ka basiyo sa kalibre 45 ug napulo ka basiyo usab sa kalibre 9mm nga mga bala uban sa usa ka "fragmentation grenade" ang narekober sa kapolisan diha sa crime scene.