Gibutyag ni dela Victoria sa Banat News nga dili lang potassium nitrate ang gipamaligya sa maong tawo kundili lakip na ang ammonium nitrate ug cyanide nga parehong gamiton sa iligal nga pagpangisda.
Kini maoy iyang reaksyon human makabasa dinhi sa Banat News sa awhag ni Konsehal Edgardo Labella ngadto kaniya ug Cebu City Police Office Director Melvin Gayotin nga mohimog aksyon sa impormasyong nadawat nga diha napalit ang mga pulburang gigamit sa mamuhatay og dinamita nga si Romeo Largo kinsa nadakpan sa mga sakop sa Criminal Investigation and Detection Group didto sa Gindakpan Island sa Bohol.
Si dela Victoria sa iyang bahin nagkanayon nga angayang awhagon usab sa konsehal ang Philippine Coast Guard Station-Cebu aron maoy mohimog pre-departure inspections sa mga panagatan nga mamiya diha sa Pasil fishport matag adlaw.
Posibleng sa pagbalik sa mga panagatan didto sa ilang mga lugar duna nay mga napalit nga pulbura gikan diha sa Pasil ang maong mga bangka, apan dili kini mahimong mainspeksyon sa Bantay Dagat ang mga bangkang manglawig sanglit ang coast guard ra ang dunay katungod sa paghimo niini.
Dugang pa ni dela Victoria nga dugay na nilang napanid-an ang maong tawo kinsa mao usab ang tawong gironda sa mga sakop sa Police Regional Office 7 diha sa Biasong, Talisay kaniadto gumikan usab sa pagbaligya og mga pulbura.
Giingong retail lang ang pagbaligya niini gikan sa usa ka kilo ngadto na sa napulo ka kilo ngadto sa mga mananagat nga mamalit, giingon usab nga anha lang kini ibutang sa mga kahon sa mga panagatan.
Si Labella sa iyang resolusyon nga ipasa sa sesyon karong Miyerkules diha sa konseho mipasabot sa danyos ug peligro nga nahimo niining paggamit sa mga dinamita sa pagpanagat dili lang dinhi sa kabaybayunan sa dakbayan kundili lukop nasud.