Konseho manginlabot na vs vigilante killings

Gibutyag ni Konsehal Procopio Fernandez, tsirman sa Committee on Police Fire and Penology kini maoy hinungdan nga subli nilang ipatawag atol sa sesyon sa konseho karong Miyerkules ang hepe sa Cebu City Police Office (CCPO) Supt. Melvin Gayotin, CIIB chief Paul Labra ug ang direktor sa Police Regional Office (PRO-7) Eduardo Gador.

Matud sa konsehal si Bise Mayor Michael Rama ang presiding officer sa konseho maoy mimando kaniya aron ipatawag og balik ang nahisgotang mga opisyal human wala kini matagbaw sa mga giluwatang katin-awan atol sa milaba'ng executive session niadtong Biyernes.

Giangkon ni Fernandez nga wala sila matagbaw sa mga giluwatang pamahayag nila ni Gayotin, Labra ug PRO-7 Deputy Regional Director for Administration Supt. Ronald Roderos atol sa milabay'ng sesyon niini.

Gipadayag sa konsehal nga gikinahanglan gyud nga mopatuman og subsob nga kampanya ang kapolisan aron masumpo ang vigilante killings ilabi na karong nagsingabot ang Pasko aron dili mahadlok ang mga lokal ug langyaw nga negosyante pagbubo og puhonan dinhi sa dakbayan.

Alang sa konsehal gikinahanglan nga masiguro ang kaluwasan sa mga negosyante nga magsuroy-suroy dinhi sa dakbayan aron magpabiling molambo ang ekonomiya ug turismo ning dakbayan.

Pagkakaron gibanabanang mokabat na sa 105 ka mga gidudahang notadong kriminal ug mga ex-convict ang gipangtumba sa gidudahang vigilante group gikan niadtong Disyembre sa milabay'ng tuig.