Mangaoang mibasol sa politika sa pagtibugsok sa koleksiyon sa Adwana

Gibasol karon ni Cebu Customs District Collector Ma. Lourdes Mangaoang ang kaguliyang sa politika sa nasud nga maoy nakaingon nga nagkaanam nga pagkunhod sa koleksyon sa adwana sa Sugbu.

Miangkon si Mangaoang nga gamay ang iyang nakolekta karong bulana kun itandi sa mga nangaging bulan sukad nga siya milingkod sa maong posisyon niadtong Mayo.

Dugang pa niya wala niya masunod ang target nga P336 milyones sanglit kapin P200 milyones lang ang iyang nakolekta karon maong giisip niya kining negatibo kung ang porsiyento ang hisgutan.

Matud pa niya usa sa hinungdan niini mao ang pagmenus og dunggo sa mga dagkong cargo vessels gikan sa ubang nasud nga dunay mga imported nga kargamentong mahimong makolektahan og buhis.

Kaniadto sa bag-o pa si Mangaoang matud pa niya nga dunay dili momenus pito ka mga dagkong barko nga modunggo nganhi aron apan sugod nga nagkagubot ang mga politiko sa nasud mikunhod kini ug panagsa nalang nga dunay moabot nga lima ka barko dinhi sa Sugbu matag semana.

Gipanghinaut sa kolektor nga mabalik ang naandang gidaghanon sa mga barkong mangabot karong bulan sa Disyembre gumikan usab sa nagsingabot nga pasko.

Gikabalak-an ni Mangaoang nga kun dili magbalik ang normal nga gidaghanon sa mga barkong mosulod sa Sugbu dili na niya makab-ot ang target nga P3.9 bilyones karong tuiga.

Sumala pa niya nga ang mga importer karon mipatuman "wait-and-see" nga taktika kini ang pagpaniid sa kasamtangang sitwasyon sa administrasyon ni Presidente Gloria Arroyo.

Sa gipadalang text message ni Mangaoang nganhi sa Banat News mitug-an siya nga ang target sa Bureau of Customs sa kinatibuk-an mikabat sa og P151.181 bilyones karong tuiga.

Niadtong ikaduhang kwarter ning bulana mapasigarbuhong gipahibalo ni Mangaoang nga nalabwan niini ang gi-target nga kolektahon nga P200 milyones dihang dul-an tunga sa bilyon ang iyang nakolekta kun itandi sa samang kwarter sa milabayng tuig.