Polis blangko pa Centcom "motabang"

Padayon pa nga gisusi sa kapolisan sa lungsod sa Tuburan ang motibo sa pagpamusil sa usa ka babaye nga organizer sa human rights advocate nga Karapatan niadtong Huwebes sa hapon diha sa Sityo Punta Barangay Punta lungsod sa Tuburan.

Hangtud karon wala pa mailhi sa kapolisan ang suspetsado kinsa dali nga miikyas human sa maong hitabo.

Ang biktima nga si Emmylou Cruz mipasangil nga mga sakop sa 78th Infantry Battalion ang mga suspetsado.

Matud pa ni SPO3 Lino delos Santos deputy chief sa kapolisan sa Tuburan nga andam na ang reklamo nga ipasaka sa biktima ngadto sa suspetsado apan wala pa silay matumbok sa ilang pasakaan sa kaso.

Kagahapon sa hapon si Cruz uban sa grupo niini miadto sa buhatan sa kapolisan sa Tuburan diin mihangyo kini og police line up para ilhon ang suspetsado.

Si Lt. Col. Jefferson Omandam mipasalig nga hatagan nila og pagtagad ang pasangil ni Cruz ug mipahigayon usab sila og imbestigasyon.

Matud pa ni Omandam nga gi-welcome nila ang imbestigasyon tungod kay ang grupo sa mga militante permamenteng mopasangil ngadto kanila.

Si Omandam midungag nga motabang sila pag-imbestigar sa pasangil. Si Cruz naglakaw paingon ngadto sa meeting niini sa mga mananagat sa nahisgutang lugar dihang gisugat sa tulo ka wala mailhi nga tawo sakay og motorsiklo usa niini mipusil sa biktima.

Si Cruz kinsa nagkanayon nga dili siya makalimot sa hitsura sa nagpusil kaniya nakaangkon og samad pinusilan sa tuong suso.