CLEAR-7 mipahalipay sa CIDG-7 tungod sa dakop sa 'dinamitero'

Gihatagan og pasidungog sa Coastal Law Enforcement Alliance in Region 7 (CLEAR-7) ang buhatan sa Criminal Investigation and Detection Group 7 gumikan sa pagkaaresto sa nagsuplay og mga gamit paghimog dinamita sa Talibon sa milabay'ng semana.

Si Police Chief Inspector Raul Rendon kinsa usa sa 11-member signatory sa CLEAR 7 ug mao usab ang Regional Police Environment Desk Officer (RPEDO) mipasidungog sa CIDG7.

Nasikop sa maong operasyon si Romeo Largo diha sa Guindacpan Island sa Talibon, Bohol diin nakuhaan kini og usa ka kilong Potassium nitrate ug mga kagamitan sa paghimo og dinamita.

Armado sa search warrant nga giisyu ni RTC branch 2 Judge Venancio Amila gironda sa CIDG7 uban sa mga sakop sa 701st Mobile Group ug Talibon police ang maong isla.

Nasayran nga diha magpalitan og Potassium nitrate sa barangay Pasil ning dakbayan si Largo apan nagdumili kini sa pagtug-an kung si kinsa ang iyang suplayer.

Sa gisumitir nga report sa CIDG 7 miabot na sa 21 ka sakong mga potassium nitrate ang ilang nasakmit uban sa 250 ka mga blasting caps diha sa Talibon. Kining maong kemikal nga maoy lutuon sa mga mamuhatay og dinamita aron maoy gamiton sa ilegal nga pagpanagat.

Sumala pa ni CIDG-7 Bohol Sr. Inspector Ricarido Flores ang usa ka kilong potassium nitrate makahimo na og upat ka regular size nga botelyang dinamita apan mahimo kining ikumbirtir ngadto sa 2,300 ka mga blasting caps.

Nakuha gikan kang Largo gawas sa sagol paghimo sa dinamita mao ang homemade .22 kalibre nga riple ug silincer para niini.