M-cab driver gikulata sa duha ka opisyal sa PNP

Midangop sa kapolisan ang usa ka multicab driver kinsa mipasangil nga gikulata sa duha ka opisyal sa kapolisan nga nahitabo alas 7 pasado ang takna sa miaging gabii sa barangay Pusok, siyudad sa Lapu-Lapu.

Ang mireklamo mao si Arnie Cepada, 32 anyos, minyo nga taga barangay Magsaysay, dakbayan sa Toledo ug temporaryong nagpuyo sa barangay Mactan sa nahisgotang dakbayan.

Ang gialegar sa biktima nga nagkulata kaniya mao sila si Inspector Rolando Daniel sa Lapu-Lapu Police Station ug Inspector Reynante Lambojo sa Presinto 3 sa Basak Police Station sa dakbayan sa Mandaue.

Sa alegasyon sa biktima ngadto sa mga imbestigador nga ang duha magpahatod unta ngadto sa Mulle Osmeña sa Poblacion sa dakbayan sa Lapu-Lapu alang sa pagsakay niini sa Ferry Boat paingon sa dakbayan sa Sugbo.

Nasuko ang maong mga polis dihang iyang gibalibaran nga maoy hinungdan nga gikulata siya niini atubangan sa mga sakay niining pasahero gikan sa Mactan Export Processing Zone.

Hinuon atol sa imbestigasyon ni Inspector Francisco Baguio, hepe sa Internal Affairs and Investigation Section sa nahisgotang kuwerpo ang duha hugtanong mihimakak niini.

Matud pa sa duha ka polis nga nanganaug na lamang sila dihang gibalibaran niini nga dili na mobiyahe apan sa pag-abot sa unahan nanawag kini og pasahero nga maoy nakaaghat kanila sa pagsukitsukit niini sanglit ilang namatikdan nga namili kini og pasahero.