Koreano nalumos kay gi-atake samtang nag-diving

Giatake sa kasing-kasing samtang nag-diving ang diver nga Koreano nga nalumos sa kadagatan sa isla sa Sumilon, lungsod sa Oslob niadtong Miyerkules sa buntag hinungdan sa iyang kamatayon.

Kini base sa imbestigasyon sa kapolisan sa lungsod sa Santander mahitungod sa maong kaso.

Ang patay'ng lawas ni Byoung Bok Park, 22 anyos, gidala na sa iyang kaubanan balik sa ilang lugar sa Seoul City, Korea niadtong Huwebes.

Si Park usa sa 27 ka Korean nationals nga mi-checked-in sa PG Divers Inn sa barangay Lilo-an, lungsod sa Santander niadtong Nobiyembre 20.

Sigun sa asoy sa mga kawani sa maong Inn nga nangadto sa isla sa Sumilon ang mga KorEano niadtong Miyerkoles sa buntag.

Mao nalang ang ilang nasayran nga usa kanila nga si Park ang nalumos human ni-dive sa 14 ka metros nga gilawmon sa dagat ug gidala sa Siliman General Hospital sa dakbayan sa Dumaguete, lalawigan sa Negros Oriental nga atbang ra sa nahitaboan.

Base sa paghiling sa mga doktor nga atake sa kasing-kasing ang namatyan ni Park.