Huwes gibasol ni Tomas

Gibasol ni mayor Tomas Osmeña ang korte sa mga nahitabong pagpangawat sa mga kabtangan diha sa South Reclamation Project (SRP) human gimandu niini ang pagpa-abli ngadto sa mga motorista sa South Coastal Road (SCR).

Atol sa press conference sa mayor kagahapon sa udto gipadayag niini nga kon siyay pabut-on ang huwes nga maoy nagmandu sa pagpa-abli sa SCR maoy angay manubag og motapal sa mga kabtangan nga gikawat diha sa SRP nga gipanag-iya sa siyudad.

Kun kahinumduman nga si RTC Judge Soliver Peras maoy miluwat og kamanduan ngadto kang Osmeña nga himoong bukas ang coastal road sa mga motorista human gipaboran niini ang petisyon ni Atty. Alfredo Sipalay.

Nasayran nga gibanabanang moabot na og dul-an sa duha ka milyon ka pesos ang balor sa mga kabtangan nga gipangkawat diha sa SRP sama sa circuit breaker.

Apan gibutyag ni Osmeña nga iya pang kunsultahon ang City Attorneys Office kon legal ba ang mao niyang tinguha nga planong pagpabayad sa huwes sa mga nahanaw nga butang.

Gibutyag sa mayor nga ang pagpangawat sa mga kabli og ang paghugaw hugaw sa palibot sa SRP maoy usa sa hinungdan nga iyang gi-regulate ang mga tawong tugutan nga makasulod og mo-agi sa SCR pinaagi sa pagpang-isyu og SRP pass.

Gi-angkon sa mayor nga limitado karon ang iyahang mahimo pagpangita og paagi unsaon nga masumpo ang maong problema gumikan sa giluwatang kamanduan sa korte. Yes, Im serious to ask the judge to pay it, but I have to consult my lawyer first", dugang asoy ni Omeña.

Matud ni Osmeña gihimo na niya ang tanan aron palig-onon ang siguridad sa SRP apan iyahang gi-klaru nga dili usab mahimo nga ihurot niya og distino ang kadaghanan sa mga polis diha sa SRP gumikan kay mabiya-an ang pag-mentinar sa kahusay ug kalinaw sa ubang mga lugar dinhi sa dakbayan.