Pabrika'g pekeng VCD gironda

Gidudahang mamuhatay og mga pirated VCD's, DvD's dinhi sa dakbayan gironda sa mga sakop sa Criminal Investigation and Intelligence Bureau sa Cebu City Police Office niadtong milabay'ng gabii diha sa Guadalupe.

Gironda ang panimalay ni Joel Almerez,diha sa Door 2, Buhisan Apartment sa dalan V.Rama sa naasoy'ng barangay pinasikad sa search warrant nga giluwatan ni RTC Branch 11 Judge Gabriel Englis gumikan sa paglapas sa Intellectual Property Rights Act sa Akta Republika 9239 kun pagpamirata.

Nasayran nga ang duha ka kontrobersyal nga mga polis sa CIIB nga sila si PO1 Albert Luardo ug PO1 Roy Veloso maoy mi-'project' sa maong operasyon niadtong milabay'ng semana.

Apan giingong wala kini mahinayon dihang miaplay sila og search warrant sa korte gumikan kay wala maklaro kung unsay kalapasan ni Almerez nga nahimo.

Niadtong milabay'ng Sabado nangabot ang mga sakop sa Optical Media Board sa Manila ug nag-uban sa CIIB mipahigayon og pagpangronda sa mga baligyaanan og mga pirated VCD ug DvD diha sa dalan Colon ug diha na gipangutana sa CIIB kung unsay posibleng kalapasan ni Almerez.

Nunot sa kasayuran gikan sa OMB nahatagan og search warrant ang CIIB ug gironda ang panimalay ni Almerez.

Nakuha gikan sa apartment sa suspek mao ang 12 ka sakong mga blangkong optical CDs, blank CDs, tulo ka computers uban sa CPU ug 12 usab ka compact disc writer, tulo ka digital video disc(DVD) writer ug uban pang kahimanan nga gituohang gigamit sa ilegal nga pagpangopya og mga pelikula, musika ug uban pa.

Sumala pa sa kapolisan mokantidad og P400,000 ang maong mga nakumpiskar nga mga kahimanan gikan kang Almerez.

Si SPO1 Filomeno Mendaros nagkanayon nga dunay kalapasan si Almerez gumikan sa pag-operate niini ug paghupot sa maong mga kahimanan nga walay permiso sa OMB.

Dugang pa niya ang permisong ihatag sa OMB mo-specify gyud kung asa mag-operate ug kun dunay laing gikinahanglan na usab ang paglukat og laing permiso.

Nagduda si Mendaros nga dili lang kadto ang dapit nga dunay operasyon si Almerez sanglit dunay mga resibong gikan nga ilang gituohang gikan sa mga dapit nga dunay outlet si Almerez.