Mga mananaygon sa Mandaue dakpon

Dakpon ang mga mananaygon sa bisan asang dapit sa dakbayan sa Mandaue niining panahon sa Pasko kun mapakyas kini sa pagkuha og permit gikan sa City Hall ug pahamtangan kini og multa o pagkabilanggo.

Ang pagkuha og mayor's permit gikan sa city hall gitumong aron sa paghapsay sa palibot sa kabarangayan ug ang dakbayan nga mahimo lamang legal sa panaygon kun maghupot sa maong dokumento.

Si Konsehal Wenceslao Gakit, majority floor leader sa konseho sa maong siyudad sa regular sesyon nga ilang gipahigayon miduso sa pag-amendar sa daan nga ordinansa nga nagpausbaw sa balayranan sa pagkuha sa permit ug kantidad sa multa.

Sa 1986 nga ordinansa nga P10 lamang ang balayranan alang sa pagkuha og permit ang gipausbawan na ngadto sa P250 nga pagpabayad og P1,500 nga kaniadto nagkantidad lamang og P100.

Sa giamendar nga ordinansa ni Gakit, ang makalapas nga mananaygon nga walay mayor's permit ang sama gihapon sa 1986 nga ordinansa nga 30 ka adlaw nga pagkabilanggo.

Higpit usab nga gidili sa maong ordinansa sa dakbayan ang pagpanaygon kun lapas na sa alas 10 ang takna sa kagabhion gawas lamang sa Disyembre 24 nga bespiras sa Pasko ug 31 nga mao usab bespiras sa Bag-ong Tuig.