'Namago'

Usa ka sugarol nga wa mobayad sa iyang pilderong pusta gipusil patay sa daugan sa pustahanay sa duwang volleyball didto sa barangay Guindarohan, Minglanilla niadtong Domingo sa hapon.

Ang biktima nailhang si Salvador Alcanzado Abanto, 68, minyo ug mag-uuma sa Guindarohan.



Samtang ang suspetsado nailhan lang nga usa ka Jun Ramos, hingkod, ug taga Sibonga, apan kasamtangang nagpuyo sa sitio Estaka, Tungkop, Minglanilla.

Si SPO1 Rolando Cinco, desk officer sa Minglanilla Police station nagkanayon nga duha ka bala sa wala hisayring kalibre sa armas miigo sa tiyan sa biktima nga maoy nakapatay niini.

Matud pa ni Cinco nga nasuko ang suspetsado kay dihang midaog kini sa volleyball gisingil na niya ang biktima kinsa didto miposta sa kaatbang apan nagdumili kini sa pagbayad ug mihimakak nga mipusta siya batok sa suspetsado.