Apan nasutang ang maong bata namatay sa sakit nga tipdas gumikan sa grabeng hilanat nakabsan kini sa kinabuhi.
Sa sayo pa naalarma pag-ayo si San Roque barangay Kapitan Rogelio Ruizo pagkadawat sa impormasyon nga giablihan sa mga kabanay ang patayng lawas sa bata nga giputos sa mga medical personnel sa CCMC og habol ug gipapitlan og pagkaging tape.
Sa pakighinabi sa Banat News gibasol sa kapitan ang mga residente nga mitawag sa sibyaanan DYAB nga mitug-ang dunay namatay nga susamag gitaptan og sakit nga meningo diha sa iyang barangay, dihang gitawgan siya sa DYAB mirason siyang gitubag lang niya ang angayang itubag aron usab malikayan pa ang dugang trahedya kun tinuuray pa nga meningo ang maong sakit.
Matud pa ni Kapitan Ruizo nga gitapuk-an sa mga kabanay ug mga silingan ang namatay nga si Mary Ann Jalandoni gani duna pay mga nagdalag mga anak nga gikugos-kugos samtang nangusyoso.
Nasayran nga ang bata gidala diha sa CCMC sa milabayng gabii gumikan sa taas kaayo nga hilanat apan taud-taud gidala kini pauli sa inahan, dangtan pagkakadlawon gidalig balik sa ginikanan ang bata diha sa CCMC apan wala abti og pila ka oras nakabsan kini sa iyang kinabuhi.
Sa sayo pa giingong dunay gipakitang mga susamag sintomas sa sakit nga meningo si Mary Ann apan natinong tipdas ra diay ang sakit niini nga gikumpirmar usab kuno ni Dr. Fe Cabugao sumala pa ni Ruizo.
Matud pa nga dunay mga nanggawas nga rashes sa lawas sa biktima, ang maong sintomas giingong pareho sa sintomas sa sakit nga "meningo."
Si Dr. Myrna Go sa pakighinabi sa mga tigbalita nagkanayon nga dili pa makumpirmar kun meningo ba ang mitakboy sa bata sanglit dili paigo ang nakuhang blood sample sa bata aron unta himuan og blood culture experiment.
Sa wala pa mahibaw-ing dili meningo ang sakit sa bata midesisyon si Ruizo nga ipalubong dayon ang bata ug ibutang ang mga mipaduol sa minatay sa kwarantina aron makasiguro.
Nagkanayon ang kapitan nga bisan si Mayor Tomas Osmeña iyang gitawgan sa namugnang "panic" diha sa iyang barangay.
Dugang pa sa kapitan nga ulahi na dihang nakumpirmar nga dili meningo ang sakit sa bata sanglit gidala na kini ngadto sa Metropolitan Cathedral alang sa bendisyon ug gilubong dayon sa Carreta kagahapon.
Sumala pa sa mga eksperto nga ang maong sakit daling motakod ngadto sa mga tawong ma-exposed kun mapaduol lang sa mga patay nga nataptan niini, ang maong sakit anha moatake sa utok nga makaingon sa hinanaling kamatayon sa mga biktima.Kasagaran dili na maabtan og 24 oras ang mga mataptan niini.
Kining maong sakit maoy nakapiang sa turismo sa Baguio City niadtong pipila na ka bulan ang milabay gumikan sa daghang mga kaso nga natala ug mikalas usab og mga kinabuhi.