Priso naka-eskapo

Usa ka pinirisong bag-ong nag-atubang og lain na usab nga kaso padayong gipangita sa kapolisan sa Tabuelan human kini maka-eskapo sa milabay'ng adlaw.

Human sa sentensiyang gihatag sa kasong attempted homicide mipugong sa pag-release ang kapolisan sa Tabuelan sa pinirisong si Eleazar Dura tungod sa lain na usab nga warrant of arrest batok kaniya sa kasong qualified theft didto sa Samar.

Sumala ni SPO3 Dionisio Epile sa Tabuelan Police Station, gipahulat na lang nila ang pagkuha sa Samar Police Statin sa maong piniriso aron ngadto mismo ipahamtang ang kaso kay kini gawas man usab sa ilang hurisdiksiyon.

Atol sa senemanang "sunning" sa maong presinto aron sa paghatag sa mga piniriso sa ilang physical conditioning, unang gipa-initan sa adlaw ang kauban ni Dura sa selda. Apan dihang si Dura na ang gihatagan sa iyang turno, kalit lang mibagting ang telepono sa Treasurer's Office diin tungod sa kaugalingong pagtuo sa importanteng tawag, napunit sa officer on duty nga si PO3 Wilson Abot ang telepono ug diha gipahimuslan sa maong piniriso ang panahon nga maka-eskapo. Dihang nakabantay si PO3 Abot, iya kining gigukod apan daling nawala si Dura.