Usa sa nadakpan nga si Jose Roy Quimada, ang gitumbok nga utok sa mga tulis sa pawnshops ug mga bangko sa dakbayan sa Sugbo ug kauban sa grupo nilang Rey Torres ug Danny Limutan.
Kagahapon gipasaka na ang kasong robbery batok kang Quimada, Earl Allen Mondarte ug laing upat nga wala pa nadakpi sa kapolisan.
Matud pa ni Loot ang upat nga sila si Junnard Saladaga, Richard Intoy ug duha nga nailhan lang sa Glen ug Gemma kuhaan pa og warrant of arrest sanglit giangkon mismo ni Quimada nga ila kining kauban sa pagpanulis.
Hinuon walay kompiyansa si Loot sanglit piyansado ang kaso ni Quimada.
Samtang makig-alayon ang CPPO sa tagdumala sa Cebu Business Hotel sa pagpasaka sa kasong estafa human nasuta nga usa sa mga tulisan ang nipuyo sa hotel sanglit may yawe nga nakuha ang kapolisan gikan sa mga suspek.
Ang yawe nagdala sa room 443 sa maong hotel ug giingong ni-check-in ang usa kanila niadtong Septiyembre 14, 2005 ug nagdala sa ngalan nga Manuel Aldrin ug nagbilin kini og P8,000 nga billing nga wala bayri.
Si Quimada daan nang may warrant of arrest sa kasong estafa didto sa Pagadian City hinungdan nga wala na kini makalusot gikan sa kapolisan bisan pa sa pagpanghimakak niini nga maoy nitulis sa Aspac Rural Bank.