15 ka batang lalaki gi-molestiya's bayot: 50-anyos nga suspek gipangita sa polis

Gipangita karon sa kapolisan ang usa ka 50 anyos nga "bayot" human kini gipasanginlang "mimolestiya" sa 15 ka mga batang lalaking silingan diha sa usa sa mga barangay sa lungsod sa Cordova.

Inubanan sa ilang mga ginikanan midangop sa buhatan sa Cordova Police Station Womens Desk ang mga batang nag-edad pa og siyete anyos ngadto sa trese anyos diin walo pulos nagtungha sa elementarya ug high school samtang ang uban mga istambay.

Si PO1 Michelle Baluyo mitug-an sa Banat News nga ilang gipangita karon ang usa ka Tito Fred Batuon, kinsa kanhi nagpuyo diha sa nahisgutang barangay apan niadtong tungang gabii sa milabay'ng Martes giingong miikyas ang suspek ug mibalhin og puyo.

Matud pa sa gipanug-an sa mga bata nagsugod ang pagpangmolestiya sukad niadtong pista sa ilang lungsod niadtong Agosto 15 ning tuiga diin si Batuon bag-uhay pa usab nagpuyo sa ilang barangay.

"Hatagan man kuno og P5.00 kadtong mga gagmay, kadtong dagko P20, P40 usahay P60 unya duna poy tag gatos pero giutang," asoy pa ni Baluyo.

Usa ka babayeng barangay konsehal (ngan gipugngan) maoy gikatahong mitawag kang Baluyo niadtong Lunes sa hapon ug pagka-alas 5 sa hapon miabot ang mga biktima ug ginikanan diha sa ilang buhatan.

Giingong nabaniog na kaayo ang gihimo sa suspek diha sa mga bata diha sa ilang barangay, dugang pa niini dunay mga biktima nga nangreklamong napugos nalang sila pag-uban kay bitaron man sila bisan sila naduwa.

Matud pa ni Baluyo nga ang mga gagmay'ng bata maoy paduwaon sa suspek sa iyang kinatawo gani gimustra pa sa mga bata diha sa atubangan sa polis kung giunsa ang gipabuhat kanila, samtang ang mga dagko maoy hilabtan sa suspek.

Nunot sa mga reklamo si Baluyo nagpatabang sa Department of Social Welfare and Development , gipaabot nalang nga pormal nga mosang-at og reklamo ang mga ginikanan batok sa suspek apan giangkon ni Baluyo nga dunay mga ginikanan nga dili interesado og pagpasaka sa kaso sa suspek sa wala matinong rason.

Hinuon si Baluyo nagkanayon nga mahimo gihapon nilang pasakaan ang suspek og kasong kalapasan sa Akta Republika 7610 kun pagpangabuso sa bata bisan dili interesado ang ginikanan sa mga biktima.