CJ Davide moretiro na karong Disyembre 20

Si Supreme Court Chief Justice Hilario Davide Jr. gikatahong moretiro na karong umaabot Disyembre 20 atol sa iyang ika-70 nga adlaw'ng natawhan.

Nunot niini kinahanglan na usab pilion ang mopuli kaniya isip ika-21 nga Chief Justice sa Supreme Court, ug usa ka Associate Chief Justice nga molingkod unya isip ika-15 nga miyembro sa Supreme Court.

Subay niining maong piniliay, nagkapundok na usab ang nagkalainlaing mga sektor sa nasud pinanguluhan sa Transparency and Accountability Network (TAN) nga ubos sa proyekto nga Supreme Court Appointments Watch (SCAW) nga maoy mubantay sa umaabot nga piniliay sa usa sa pinakataas nga posisyon sa gobyerno.

Segun sa asoy ni Atty. Jose Roy III sa Pamantasan ng Lungsod ng Maynila, nga katuyoan usab sa maong proyekto ang pagseguro sa kridibilidad sa posibleng mapili sa maong katungdanan.

Niadtong Nobiyembre 4 gisugdan na ang pagpasa og mga nominasyon sa maong mga bakanting katungdanan ug gitinguhang mapadugay pa ang maong proseso aron sa pag imbestigar kun haum ba sila isip mga nominado sa maong posisyon.

Ang lima sa mga posibleng mohulip kang Davide mao ang mga Associate Justices nga sila si Puno, Reynato, Artemio Panganiban, Leonardo Quisumbing, Consuelo Ynares-Santiago ug Angelina Sandoval-Gutierrez.

Si Roy midugang nga naandan na nga ang labing taas ug tuig sa pagserbisyo atol sa maong pagkabakante mao ang automatic nga mapili.

Ubos sa atong Konstitusyon ang bakante nga posisyon sa Supreme Court kinahanglan mahulipan sulod sa 90 ka adlaw gikan sa pagkabakante niini.