Si Konsehal Edgardo Labella nga maoy tsirman sa committee on laws miluwat niining maong legal opinion human nangayo og katin-awan kabahin ning maong isyu ang City Traffic Operation Management (CITOM).
Si Labella nga kanhi usab direktor sa Visayas Ombudsman namahayag nga ang Akta Republika 3837, ang charter sa dakbayan sa Sugbo naglatid nga ang mga opisyal sa siyudad makahimo sa pag-regulate sa mga PUJ vehicles ingon man pagtumbok og mga PUV terminals.
Ang maong isyu mitumaw human sa gimugna nga ordinansa sa siyudad C.O. 1837 nga naglatid nga ang mga PUV nga nagbiyahean gawas sa dakbayan adto na lang kutob sa mga gitumbok nga accredited terminals dinhi sa dakbayan.
Tumong ug tuyo sa maong ordinansa aron masulbad o ba kaha maminusan ang kahuot sa mga sakyanan nga mosulod dinhi sa dakbayan.
Apan bisan pa niini ang mga drayber nga nagbiyahean sa rota nga Mandaue Jones ang wala gyud mopatuo niining maong ordinansa og gani nagpadayun kini sa ila karung pagpamasahero lahos sa Fuente Osmeña ug Osmeña Boulevard bisan pa sa kanunay nga pagdakop kanila sa Citom.
Nasayran nga una nang gipadayag sa giluwatang legal opinion ni Bautista nga bugtong ang LTFRB lang ang adunay katungod pag-usab usab sa rota sa mga PUJ.