Matud pa ni Mayor Mario Patrick Barcenas nga matag kaluha, gi-andaman na og pahalipay gikan ni Gobernador Gwen Garcia.
Lakip sa mga kaluha nga makadawat sa mga pahalipay ug kauban sa pasunding, mao ang mga igsuon ni Manlalaban Democrito Barcenas, matud pa sa mayor.
Mapasigarbuhon kaayo ang kagamhanan sa Carcar kay sa unang higayon, nahatagan nila og dako kaayong kahigayonan ang paghinumdom sa managsuong kaluha sa lungsod.
Matud pa ni Barcenas nga ila kining gihimo dihang nasuta nila nga puwerting daghanang managsuong kaluha sa lungsod.
Atol unya sa pasunding, kadtong mga kaluha nga dili pa makalakaw kay bag-o pang natawo o gagmay pa kaayong bata, pasakyon nalang og mga sakyanan alang kanila.
Matud pa ni Barcenas nga gusto niyang sa unang higayon ikatala kini sa kasaysayan sa lungsod nga mahimo nang bahin sa matag tuig nilang kalihukan.
Ang paghatag pasidungog sa mga kaluha, himoon na matag Nobiyembre apan sa gihapon padayon ang kagamhanan sa lungsod sa pagpahinumdom sa tanang magtiayon bahin sa maayong pagsunod sa balaod sa pagplano sa pamilya, matud pa ni Barcenas.