Nag-wild gipusil patay sa polis

Wala kaporma ang usa ka wala mailhing lalaki nga gialarmang nag-amok ug nakatigbas og tulo ka pasahero human kini pusila sa duha ka mga sakop sa beat patrols sa Police Station 6 sa Cebu City Police Office kagahapon sa buntag diha sa barangay Sawang Calero ning dakbayan.

Ang napatay sa kapolisan gibana-banang nagpangidaron og 20 ngadto na sa 30, dunay gitas-ong 5'5 ug nagsuot og maong nga pantalon ug t-shirt nga kolor orange ug checkered nga longsleeves polo kolor asul.

Sumala pa sa imbestigasyon sa Homicide Section sa nag-amok ang lalaki diha sa atubangan sa San Nicolas Church dala ang 40 pulgadas nga bolo ug kalit nga nanigbas sa mga pasaherong luwan sa usa ka PUJ padulong sa dalan Colon.

Sila si Henry Abadilla taga C. Padilla, William Tan, taga Spolarium ug Nicanor Cabonales wala magdahum dihang kalit nga gitigbas ang ilang mga likod atol sa pag-aginod sa ilang gisakyan.

Human sa pagtigbas gigukod ang biktima sa mga tawo hangtud sa dalan Tomas Abella diin nangita kini og laing tigbason, diha na siya maabti nila ni SPO1 Gregorio Taneo ug SPO1 Russel Teves kinsa maoy beat patrol sa Pasil Market duol sa gikahitaboan.

Matud pa sa homicide investigators gisuwayan pa og kumbinsir sa mga polis ang biktima sa paglabay sa gibitbit nga bolo ug gipabuthan pa kini og warning shot apan giingong miasdang hinuon.

Unang gitirahan ang bugan niini apan wala gihapon mopatuo maong dihang giusban diha na kini maigo sa iyang aping hinungdan sa hinanali niyang kamatayon.

Si Taboan Police Chief Anthony Obenza mimando sa iyang mga sakop sa pagpasurender sa 9 mm pistol ug 38 kalibre rebolber sa duha ka polis ngadto sa Homicide Section apan miklaro nga magpabilin gihapong beat patrol ang duha sa maong merkado.

Gipasalig niyang mopatim-aw ang iyang mga sakop kun dunay moreklamong kabanay sa biktima.