Asean customs meeting karon

Malaumon si Cebu Customs Collector Atty. Lourdes Mangaoang nga maangkon ang dakong kalampusan sa ipahigayong tigum sa mga directors-general of Customs of the association of Southeast Asian Nations nga sugdan karong adlawa.

Ang kalihukan ipahigayon sa Plantation Bay Resort and Spa sa dakbayan sa Lapu-Lapu kinsa si Finance Secretary Margarito Teves ang mopadangat sa iyang keynote address.

Kini ang ika-14 nga tigum sa mga Directors-General of Customs nga salmutan sa 53 ka delegado gikan sa mga nasud nga sakop sa ASEAN samtang 19 niini gikan sa Pilipinas isip host.

Si Mangaoang ang gitahasan sa pagpangandam sa kalihukan sanglit sa Sugbo man ipahigayon ang tigum.

"With the cooperation of our government officials, chamber of commerce and all Cebuanos, I'm sure that everything will turn out well," nagkanayon si Mangaoang.

Matud pa ni Mangaoang nga tukion atol sa tigum karong adlawa ang mga palisiya nga makaapektar sa kalamboan sa ekonomiya sa napulo ka nasud nga sakop sa ASEAN.

Lakip sa tukion mao ang pagpatuman sa mga nakab-ot nga kasabutan sa ASEAN Free Trade Agreement (AFTA) Council ug ASEAN Economic Ministers didto sa Vientiane, Lao niadtong Septiyembre karong tuiga.

"These are aimed as fostering trade relations among neighboring countries in the region," sumala pa ni Mangaoang.

Ang mga delegado mobisita usab sa mga tourist spots sa Sugbo ugmang adlawa sa dili pa sila manguli sa tagsatagsa nila ka nasud human sa tigum. - Gregg M. Rubio