13-anyos gi-molestiya sa tiyo

Usa ka 13 anyos nga dalagita uban sa iyang inahan midangop sa buhatan sa kapolisan sa Toledo Police station ug mireklamong gimolestiya siya sa iyang uyoan niadto pang Nobiyembre 6 sa hapon apan Huwebes na kini mitug-an sa iyang inahan.

Sumala pa sa biktima (ngalan gipugngan) kasamtangan siyang nagtan-aw og basketball niadtong tungura sa basketbolan diha sa ilang dapit sa barangay Talavera dakbayan sa Toledo dihang kalit siyang gibitad sa iyang uyoan (ngalan gipugngan) ig-agaw ra usab sa iyang inahan, padulong sa balay sa suspek ug gipaadto sa silong sa basement ug didto gipugos siya og pahubo sa iyang mga sapot ug giamong-amongan sa suspek.

Sa kahadlok sa bata wala kini dayon motug-an sa iyang inahan apan niadtong Huwebes nakahukom kini sa pagsugilon hinungdan nga gidala siya sa iyang inahan sa kapolisan.

Gipailawom ang biktima sa medical examination alang sa pagsuporta sa iyang pasangil batok sa suspek. - Edwin Ian Melecio