Transport strike way epek

Transport strike kagahapon sa Alliance of Transport Operators Member Intra-Cities (ATOMIC) ni Rudy Laconza wala mabatyagi sa kadalanan human mangangkon ang kagamhanan sa Sugbo nga walay epekto ang maong kalihukan.

Diha sa dalan Colon sa sayo pa pipila lang ka mga tawo ang nagtapok gani hapon na kaayo dihang nakapahigayon sila og diskurso, samtang sa mga choke points sa Metro Cebu wala usab mabatyaging dunay rota nga naparalisa.

Namatikdan nga wala kaayo'y mga drayber nga nanguyog sa maong panawagan gani ang kadaghanan sa mga nasigpatan mao ang mga militanteng pundok nga daan nang misaad nga makigduyog sa ATOMIC.

Si Laconza sa iyang bahin bisan paman sa kagamay sa mga nanguyog sa sayo pa miingon nga wala niya panumbalinga kung gamay ra ang nanguban sanglit ang importante makapadayag sa ilang sentimiyento sa padayong pagsaka sa presyo sa palaliton ug ingon man makapanawagan sa pagbasura sa oil deregulation law.

Ang base control sa City Traffic Office Management pinaagi ni Dante Capio sa pakighinabi sa Banat News mitug-ang walay bisan usa ka rota nga nabalda. Gibana-banang duna ray 200 ka mga tawo ang nagtapok kagahapon sa hapon diha sa Colon.

Grabe hinuong traffic ang nasinati sa mga drayber nga wala manguban sa welga gumikan sa pagtapok sa mga nagprotesta diha sa mga dalan.Daan nang mipahibalo ang Nagkahiusang Drayber sa Sugbu (NADSU) ug Alyansa sa Nagpakabanang Drayber Alang sa Reporma (ANDAR) nga dili sila manguban sa maong kalihukan.

Pipila sa mga opisyal sa dakbayan mipasiaw pa sa pag-ingong kung duna bay gilusad nga transport strike sanglit wala gani nila ma-deploy ang mga sakyanang gitaganang mokuha sa ma-stranded nga mga pasahero