Nalubong sa yuta

Patay ang usa ka ugangan ug naangol usab ang umagad niini tungod kay natagakan sa midahili nga yuta nga ilang gikubkob nga dunay napulo ka tiil ang giladmon kagahapon sa alas 3 sa kaadlawon diha sa Sityo Ilang-Ilang Barangay Lagtang dakbayan sa Talisay.

Patay na nga nadangat diha sa Cebu City Medical Center niining dakbayan si Dionesio Heronga, 50-anyos, kinsa misugwak ang walang mata niini tungod sa pagkaigo sa mga bato ug yuta nga mitabon ngadto kaniya.

Matud pa ni Kapitan Celiapo "Semi" Cabuenas sa Lagtang nga ang mga biktima pulos extra laborer sa Santa Lucia Realty nga adunay proyekto diha sa Lagtang nga usa ka subdivision.

Ang mga biktima nag masa og semento aron isemento sa imbornal nga gilubong aron masumpay kini dihang nahitabo ang maong insidente

Ang umagad ni Heronga nga si Marcelo Labay, 31-anyos, swerte kay nakadagan dihang midahili ang yuta apan nakaangkon og bun-og sa iyang buko-buko.