'Manuyopay' gipatulis sa ig-agaw?

Usa ka batan-ong gikatahong padulong unta "mosuyop" gitulis hinuon samtang nagpaabot sa gipapalit nga gituohang shabu diha sa sudlunong bahin sa dalan Alumnus, Basak ning dakbayan niadtong Martes sa gabii.

Si SPO2 Junnie Bongkawil sa Mambaling police station mitug-an sa Banat News nga gihimulbolan sa iyang mahalong gamit ug kwarta si Jose Jeoffrey Losano Ramos, 32, molupyo sa Sitio Laguna, Holy Cross barangay Basak ning dakbayan.

Sumala pa ni Bongkawil dunay kauban si Ramos nga iyang ig-agaw nga si Jay Bolado kinsa lumad nga taga Negros ug suhito sa maong dapit ug maoy mikuyog sa biktima sa pagpamalit og shabu.

Giingong samtang gipaabot nila ni Ramos ang "shabu" kalit lang nahanaw si Bolado ug dangtan pila ka gutlo kalit usab nga misulod ang tulo ka wala mailhing mga tawo diin ang usa kanila armado og kalibre 45 pistola ug mimando kaniya sa paghapa.

Pugsanong gikuha sa mga suspek ang relo, silver nga kwintas, Samsung cellphone ug iyang cash nga P50 mil. Human niadto ang biktima milakaw nalang ug miadto sa presinto aron pangitaon ang iyang ig-agaw sanglit sukad nga mibiya kini wala na kini mobalik.