Notadong tulisan patay kay nanulong, napusilan

Usa ka batan-ong gipasanginlang notadong tulisan misulong ug namusil mao hinuoy napusilan sa baba ug likod patay samtang samdan usab ang iyang gisulong diha sa Sitio Lawis, Alaska Mambaling ning dakbayan kagahapon sa udto.

Patay nang midangat sa tambalanan ang biktimang si John Carlo Sanchez alyas Unyot,18, molupyo sa maong dapit samtang ang gitumbok nga mipusil kaniya mao si Ernie Repaso,45, nanag-iyag shellcraft business sa maong lugar.

Sumala pa ni Jackson Repaso,18, anak ni Repaso sa pakighinabi sa Banat News nga si Sanchez mismo maoy misulong sa ilang balay aron komprontasehon siya (Ernie) gumikan kay nagkainitay naman silang duha gumikan sa bag-ohay lang nilang panagbangi.

Matud pa ni Jackson nga niadtong Sabado gipusil siya (Ernie) ni Sanchez duha ka higayon human niya balibari ang usa ka barkada ni Sanchez nga si Junjun kinsa gisugo ni Sanchez aron mangayo og "rugby" sa ila.

Gitug-an ni Jackson nga si Sanchez maoy kagrupo sa mga batan-ong tulisan diha sa dalan C. Padilla nga manulisay sa PUJ.

Kagahapon si Sanchez armado og kalibre 38 rebolber miadto sa balay ni (Ernie) Repaso ug dihang nakit-an kini kalit niya kining gipusil tulo ka higayon apan usa ray igo ni Repaso diha sa likod.

Dihang padulong na ikyas si Sanchez nakakuha sad og armas si (Ernie) Repaso ug nabawsan si Sanchez nga maayong pagkaigo sa may baba ug sa likod, patay na kini dihang nadangat sa tambalanan, samtang si (Ernie) Repaso nadala usab sa laing tambalanan.