3 okasyon humot sa mga terorista - RIID-7

Tulo ka sunod-sunod nga dagkung okasyon nga umaabot sa Sugbo ang giisip sa kapolisan nga humot alang sa mga terorista.

Kini mao ang 23rd Southeast Asian Games karong Nobiyembre 25 hangtud Disyembre 5 diin dunay pipila ka duwa nga ipahigayun sa Sugbo, umaabot nga Pasko ug ang Sinulog Festival karong Enero 2006.

Gipaabot nga ang maong mga okasyon, magdasok ang mga lokal ug langyaw'ng mga turista gikan sa nagkalainlaing lugar ang mobisita sa Sugbo.

"Terrorist threat in Central Visayas is imminent because it is a juicy target due to the international impact it would cause," nagkanayun ang hepe sa Regional Intelligence and Investigation Division sa Police Regional Office-7, Supt. Augustus Marquez.

Nunot niini gipahayag ni Marquez nga angayan usab magmabinantayon ang mga Sugbuanon aron dili madaut ang ekonomiya kon molampus ang kalihukan sa mga terorista. Hinoon gihangop ni Marquez ang pagpakig-alayon sa mga Muslim sa kapolisan aron pagpatunhay sa kalinaw ug kahusay sa tibouk rehiyon.