Si DSWS officer in charge Cathy Iso sa pakighinabi sa Banat News mibutyag nga duna nay mga bugas, noodles, mga sinina, tubig, mga habol ug banig ang gipang-apod-apod ngadto sa mga biktima.
Matud pa ni Iso sa natala kagahapon sa hapon nga dunay 854 ka tawo sa 189 ka pamilya, 40 porsiyento niini mga bata, ang naapektuhan sa sunog.
Dugang pa niya nga gawas sa gipagawas sa dakbayan sa Sugbo nga hinabang dunay mga hinatag gikan sa pribadong sektor ug ang uban wala na magpaila.
Bisan walay cash nga ipanghatag sa mga biktima gipasalig ni Iso nga makadawat ang matag pamilyang nasunogan og tag-10 ka compact board ug 10 ka GI sheets alang sa ilang housing materials aron kasugdan ang pagtukod pag-usab sa ilang kapuy-an.
Magpadayon ang pagpanghatag sa food assistance hangtud makumpleto og hatag ang tanang mga housing materials.
Samtang si Konsehal Sunny Gonzales sa Pahina-Central mitug-an nga mosang-at siyag resolusyon sa ilang konseho aron moawhag nga ideklarar nga "calamity area" ang naapektahang dapit.
Dugang pa niini dunay plano ang barangay nga ilang hangyuon ang dakbayan sa Sugbo nga pahakan ang lote nga gikuralan sa Regino Mercado Elementary School diha sa atbang sa ilang barangay hall aron kabutanga, og mas lapad nga agianan padulong sa sulod nga kaagian og trak sa bombero.