Gibutyag ni Konsehal Augustus Pe Jr. nga ang maong mga polis mao kini kadtong mga polis nga kanunay lang absent ug wala gyud mo-kooperar sa gipahigayong pagbansaybansay nga gipasiugdahan sa siyudad aron mamahimong hanas sa ilang paggamit og armas.
Kini maoy hinungdan nga gibati og tumang kasagmuyo si Osmeña ug dali kining mimandu alang sa pagputol sa gidawat nga incentive allowance nga tagsa ka libo matag bulan sa siyudad sa maong mga polis samtang magpabilin pa dinhi sa dakbayan samtang magpa-abot nga ka-aprobahan ang ilang request sa PRO-7 alang sa pagpabalhin og destino sa maong mga polis.
Gibutyag ni Pe nagsugod kining tanan human gi-rekomendar ni LTFRB-7 Director Rogelio Osmeña sa Cebu Rifle Pistol Association ang pagpatangtang sa insentibo sa 38 ka mga polis.
Ang pagbansaybansay nga gipasiugdahan sa siyudad gihimo niadtong Oktobre 17 hangtod sa 21 sa miaging bulan.
Giklaro ni Pe nga walay labot kadtong mga polis nga on-leave ingon man mga babayeng polis nga mabdos nga wala makaapil sa maong training seminar. Matud ni Pe wala hinooy mga opisyal nga naapil sa maong rekomendasyon nga ipabalhin og destino gawas sa Sugbo gumikan kay ang labing taas nga ranggo niini naggikan lang sa SPO3 paubos.